. പൊന്നമ്പാറ പാറയ്ക്കൽപ്പടിയിലെ വളവിൽ മെറ്റൽ മഴയിൽ ഒലിച്ച് അപകടമുണ്ടാക്കുന്ന സ്ഥിതിയിൽ കിടക്കുന്നു
അത്തിക്കയം: മുക്കട-അത്തിക്കയം റോഡിന്റെ രണ്ടാംഘട്ട നിർമ്മാണ പ്രവർത്തനങ്ങൾ അനന്തമായി നീളുന്നു. ഇതുവഴിയുള്ള വാഹന യാത്ര ദുഷ്‌ക്കരമായി. പൊന്നമ്പാറ പാറയ്ക്കൽപ്പടിയിലെ വളവിൽ വീതി കൂട്ടാനായി നിരത്തിയിരുന്ന മെറ്റൽ മഴയിൽ ഒലിച്ച് അപകടമുണ്ടാക്കുന്ന സ്ഥിതിയാണ്. കണ്ണമ്പള്ളി ജംഗ്ഷൻ വരെയാണ് രണ്ടാംഘട്ട നിർമ്മാണം. ഈ നിർമ്മാണം കൂടി പൂർത്തിയാവുന്നതോടെ 10 കിലോമീറ്റർ ദൈർഘ്യമുള്ള മുക്കട-അത്തിക്കയം റോഡ് പൂർണമായും ഉന്നത നിലവാരത്തിലാകൂ. എന്നാൽ പൊന്നംപാറ മുതൽ പഞ്ചാരമുക്ക് വരെയുള്ള ഭാഗം പാറമക്കിട്ട് നിരത്തുന്ന ജോലികൾ പൂർത്തിയായെങ്കിലും ബാക്കി പണികൾ നീണ്ടു പോകുകയാണ്. പാറമക്കിട്ട് ഉയർത്തിയതുമൂലം വാഴക്കാലാമുക്കിനെ വളവിൽ റോഡിന്റെ വീതി നഷ്ടപ്പെടുകയും വലിയ കട്ടിംഗ് രൂപപ്പെടുകയും ചെയ്തു. ഈ മേഖലയിലും പാറമക്കിട്ടത് ഒലിച്ചു പോയി കുഴികൾ രൂപപ്പെട്ടിട്ടുണ്ട്. ഇതുമൂലം അപകടങ്ങൾ ഉണ്ടാകാൻ സാദ്ധ്യത ഏറെയാണ്. ശബരിമല തീർത്ഥാടകർക്ക് റാന്നി വഴി ചുറ്റാതെ എളുപ്പത്തിൽ പെരുനാട്ടിൽ എത്തിച്ചേരാനുള്ള മാർഗം കൂടിയാണ് ഈ റോഡ്. ശബരിമല പാതയായി ഹൈക്കോടതി അംഗീകരിച്ച 17റോഡുകളിലൊന്നാണിത്.1.5കിലോമീറ്റർ ദൂരമാണ് പുനരുദ്ധരിക്കാനുള്ളത്.
